Arbër Çekaj dhe Fatmir Pjetri dështuan për tu arratisur nga burgu “313” në Tiranë, ndonëse kishin një plan të mirëmenduar. Çekaj është i dënuar me 14 vite burg, pasi në magazinat e kompanisë së tij iu gjetën 613 kg kokainë, ndërsa Fatmir Pjetri është i dënuar me 30 vite burg, si anëtar i bandës kriminale “Babagjyshi”, që grabitën disa argjendari.
Tashmë është hedhur dritë mbi skemën e arratisjes së Çekajt dhe Pjetrit, e kryer në bashkëpunim. Sipas Drejtorisë së Përgjithshme të Burgjeve, së bashku me SHKBB-në, pak momente para arratisjes, vëmendjen e forcave të sigurisë e mori një i paraburgosur tjetër, i cili po kryente një tentativë vetëvrasjeje.
“Dyshohet që tentativës para arratisjes i ka paraprirë një incident i kryer nga një i paraburgosur tjetër, i cili ka tentuar të presë damarët e dorës, duke tërhequr kështu vëmëndjen e forcave të sigurisë të cilat po merrnin masa për ta shoqëruar në spital për të marrë shërbimin e duhur shëndetësor”, thuhet në reagimin zyrtar.
Dy të burgosurit përfituan nga fakti se forcat e sigurisë nuk do të ishin shumë të përpiktë në orarin e ajrimit, një faktor tjetër kyç në planin e arratisjes. Çekaj dhe Pjetri kanë dashur të arratisen gjatë këtij orari, por u konstatuan nga punonjësit e burgut dhe gjatë tentativës, goditën një prej policëve të burgut.
Arbër Çekaj dhe Fatmir Pjetri janë vendosur në izolim, dhe do të kallëzohen penalisht për “Largim nga vendi i vuajtjes së dënimit” dhe “Goditje për shkak të detyrës”.
“Situata në IEVP 313 është nën kontroll, ndërsa të tre të paraburgosurit janë vendosur në izolim duke qënë nën rregjimin e mbikqyrjes së veçantë sipas nenit 68 të ligjit “Për trajtimin dhe të drejtat e të burgosurve”, thuhet më tej në reagim.
Për të tre të paraburgosurit po përgatiten kallzimet penale për kryerjen e veprave penale, të tentativës për arratisje “Largim nga vendi i vuajtjes së dënimit” si dhe “Goditje për shkak të detyrës”.
Apeli i Gjykatës së Posaçme kundër korrupsionit, ka lënë në fuqi dënimin me 14 vite burg për Arbër Çekajn, pronari i kontejnerit me banane e kapur me 613 kg kokainë në Portin e Durrësit. Arbër Çekaj u dënua me 21 vite burg, por përfitoi ulje nga gjykimi i shkurtuar dhe do të vuajë 14 vite burg.
Çekaj është dënuar si pjesë e grupit kriminal të trafikut të kokainës, pasi iu kap sasia prej 613 kg kokainë më 27 shkurt 2018, që e kishte fshehur në dyshemenë e konteinerit me banane. Ndërsa Fatmir Pjetri ka qenë pjesë e një grupi kriminal “Babagjyshët”, të cilët gjatë periudhës janar-dhjetor të vitit 2013 dhe në vazhdim, në qytetet e Tiranës, Laçit, Fushë-Krujës, Kuçovës dhe Durrësit, kanë grabitur me armë disa argjendari në këto qytete. /Tirana Today
