Gjykata Penale ka zbardhur vendimin ndaj ish-deputetit të PD-së, Ervin Salianji. Në vendimin e gjykatës thuhet se Salianji u përfshi në kallëzim të rremë për interesa politike të tij dhe të PD-së, duke e stisur të gjithën për ta publikuar më pas në media.
“Salianji u përfshi në kallëzimin e rreme për interes politik të tij e te PD. Albert Veliu njohur si Babalja u akomodua në seline e PD, ku ka dhënë dhe intervista. Biseda e stimuluar mes Albert Veliut dhe Fredi Alizotit është regjistruar në janar 2018. Biseda është regjistruar në një mjet përgjimi stilolaps të cilin Albert Veliu ja ka dorëzuar Ervin Salianjit.
Stilolapsin përgjues ja dha Salianji. Fredi Alizoti stimuloi zërin e Agron Geron Xhafës. Mes të pandehurve Veliu, Alizoti, Salianji, Jetmir Olldashi ka komunikime të shpeshta para e pas veprës penale.
Nuk ka asnjë shpjegim tjetër, komunikimet e tyre të shpeshta veç përfshirjes në audiopërgjim. Në tetor 2017, Albert Veliu ka marrë takim me Ervin Salianjin. Më 20 tetor 2017 Veliu ka biseduar me Salianjin për 51 sekonda. Ky komunikim perveçse motiveve për audiopergjimin, si lidh të pandehurit me asnjë shkak tjetër. Nuk jane as miq, as të afërm. Ervin Salianji realizoi kontaktin e Albert Veliut me gazetarin Jetmir Olldashi. Deklarimet publike të Salianjit nuk dhanë asnjë provë për veprën penale të trafikut të droges në ngarkim të Agron Xhafës. Pas publikimit të audiopërgjimit, ka një numër të lartë bisedash mes Albert Veliut e Fredi Alizotit, biseda këto kompromentuese.
Nga të gjitha provat dhe tabulatet telefonike, rezulton se zërin e Agron Xhafes e ka bërë Fredi Alizoti. Kjo veprintari e kallëzimit të rreme nuk mund të konsiderohet e kryer brenda fushës së ushtrimit të funksionit politik te deputetit, apo ushtrimit të lirisë së shprehjes”, thuhet në vendimin e gjykatës.
Pak më herët, gjykata e dënoi me një vit burg ish-deputetin e Partisë Demokratike, Ervin Salianji për akuzën e “kallëzimit të rremë”, në lidhje me dosjen “Babalja”. Bashkë me Salianjin janë dënuar edhe personat e tjerë të përfshirë në këtë dosje.
Fredi Alizoti, (i njohur si kunati i Babales), është dënuar me 2 vite burg për kallëzim të rremë, Albert Veliu i njohur ndryshe edhe si “Babalja” u dënua me 3 vite e 5 muaj burg, ndërsa gazetari Jetmir Olldashi është dënuar me 5 muaj burg, që i konvertohet në 100 orë punë në komunitet. Menjëherë pas dhënies së vendimit, ish-deputeti e ka cilësuar gjyqin e tij si politik, duke u shprehur se do ta apelonte vendimin.
