OFL i ka dërguar letër për deklarimin e pasurisë një tjetër personi të skeduar. Bëhet fjalë për shtetasin Lutfi Enver Shabani me banim në Durrës, të cilit i kërkohet që brenda 48 orëve të deklarojë burimin e pasurive të tij. Shabani njihet në Durrës si “Ben Çami” , ndërsa në vitin 2016 është arrestuar duke trafikuar 570 kg hashash.
Ai njihet edhe si Artan Shabani, ndërsa rezulton i dënuar dy herë nga Gjykata e Krimeve të Rënda. Po kështu Shabani njihet gjithashtu edhe si mik i Emiljano Shullazit, aktualisht në burg.
Operacioni Forca e Ligjit u ka dërguar “pusullën” 3 të dënuarve, të cilët janë Fatos Xhambazi, Besnik Imeraj dhe Lutfi Shabani. Të tre personat duhet të deklarojnë pasurinë e tyre, brenda 48 orëve dhe më pas dosjet e tyre kalojnë për SPAK.
Njoftimi
OFL, 23 shtator
Vijon pa ndërprerë Operacioni Forca e Ligjit, në zbatim të detyrave të përcaktuara në Aktin Normativ të datës 31 janar 2020.
Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve: F. Xh., banues në Korçë, i dënuar për veprën penale “Trafikimi i të miturve” kryer në bashkëpunim. B. I., banues në Durrës, i dënuar për veprën penale “Vjedhja me armë”; L. Sh., banues në Durrës, i dënuar për veprat penale “Trafikimi i narkotikëve” dhe “Prodhimi dhe shitja e lëndëve narkotike”.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.
OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.
