Presidentja e Greqisë, Katerina Sakellaropoulou, ka shprehur falenderimet ndaj rrobaqepëses shqiptare, Elona Agolli, për gjestin e kryer ku punoi për krijimin e maskave.
Në këto ditë të vështira ku ndodhet e gjithë bota, ku dhe shëndetësia është në kolaps, maskat e dorezat janë mjetet më të domosdoshme.
Presidentja greke ka falenderuar përmes një telefonate rrobaqepësen shqiptare, e cila punoi pa pushim për të qepur maskat.
Rrobaqepësja shqiptare qepi 600 maska, dhe refuzoi të merrte pagesën. Sipas saj, puna dhe lodhja nuk kishin të krahasuar me ndihmën që do jepte për bluzat e bardha.
Për të, ky gjest nuk është asgjë para punës që po bëjnë mjekët, teksa e gjithë bota është në izolim total.
Elona Agollit iu deshën 9 ditë për të qepur maskat e përbëra nga një leckë e dyfishtë, të cilave iu vu një filtër special nga spitali.
Katerina Sakellaropoulou ka bërë edhe një postim në rrjetet sociale, duke bërë shembull për këdo veprimet kaq bamirëse në kohë vështirësie.
“Rrobaqepësit e modave bëjnë maska, mësuesit vazhdojnë kurse online, bizneset ofrojnë mbështetje financiare dhe logjistike.
Akte të tilla na japin një mundësi unike, për të rimenduar vlerat tona njerëzore dhe mënyrën se si ne organizojmë marrëdhëniet tona personale, familjare dhe shoqërore”, shkruan presidentja e Greqisë.
