Bekim Fehmiu, është ndër të paktën aktorë që lindën në Ballkan, dhe shijuan një sukses në shkallë botërore, deri në Hollivud. Ai lindi më 1936 në Prizren të Kosovës, ndërsa ndoqi shkollën e aktrimit në Beograd, ku kaloi pjesën më të madhe të jetës. Rolet e tij kanë qenë të shumëllojshme, ndërsa ngjarjet zhvendoseshin nga lashtësia dhe deri në ditët tona.
Ka aktruar në krah të gjigandëve të kinemasë botërore si John Houston, Ava Gardner, Dirk Bogart, Claudia Cardinale, Irene Papas dhe Candice Bergen. Vizitoi Shqipërinë dy here, më 1971 dhe më 2001-in. Jetesa në Beograd, e bëri objekt të akuzave, se ai nuk shqetësohej sa duhej mbi fatin e Kosovës dhe bashkatdhetarëve. Por aktori i famshëm reagoi me mënyrën e tij.
Më 1987, në shenje proteste kundër propagandës antishqiptare, braktisi shfaqjen e një drame në teatrin e Beogradit, ku kishte rolin kryesor. Nga ai moment i dha fund karrierës kur ishte vetëm 51-vjeç, dhe u tërhoq tërësisht nga jeta publike. Vitet e fundit një sëmundje po i merrte dritën e syve, gjë që i rëndoi gjendjen psikologjike. U gjet i vetvrarë në banesën e tij në vitin 2010 në moshën 74-vjeçare.
