Teksa ishte i pranishëm në hapjen e ekspozitës “Përtej Kujtimeve”, në kuadër të 70-vjetorit të marrëdhënieve diplomatike mes Shqipërisë dhe Kinës, kryeministri Edi Rama tregoi një histori që kishte hasur me qytetarët kinezë. Ndërsa gjendej në një rrobaqepësi për të qepur një xhaketë.
Shefi i qeverisë u shpreh se rrobaqepëset pasi e morën vesh kush ishte filluan të këndonin këngën “ara fabrika kantiere”. Më pas, ajo që i bëri dhe më shumë përshtypje u shënua në takimin që zhvilloi me kryebashkiakun e Pekinit, i cili filloi të këndonte “malet me blerim mbuluar”.
“Më ka bërë përshtypje kur kam qenë në Kinë sepse doja të qepja një xhaketë ‘Mao’, me përmasat e mija. Sepse nuk kishte në dyqan dhe më çuan në një rrobaqepësi, që të bëja vizatimin dhe të më qepnin xhaketën.
Mund të ishin rreth 60 rrobaqepëse dhe pasi e morën vesh kush isha unë filluan të këndonin këngën ‘ara fabrika kantiere’.
Në takimin që pata në darkë me Kryetarin e Bashkisë së Pekinit i thashë më ka ndodhur kjo gjë. Ai më pa dhe filloi të këndonte ‘malet me blerim mbuluar’. Ishte një kohë kur dashuria sillte të ardhura. Kurse tani është një kohë kur të ardhurat sjellin dashurinë. Në këtë pikë ne jemi në disavantazh të madh, por do bëjmë tonën, do bëjmë më të mirën”, deklaroi Rama.
