Konflikti mes Khabib Nurmagomedov dhe Conor McGregor ka kaluar në një fazë të rëndë, ku ka sjellë edhe reagimin e presidentit të UFC-së, Dana White. Ky i fundit ka dalë në një deklaratë publike, duke i cilësuar deklaratat e dy luftëtarëve si të papranueshme.
Rivalët e përbetuar janë duke thumbuar njëri-tjetrin përmes mediave, që nga ndeshja tashmë e famshme e UFC 229, në të cilën Nurmagomedov fitoi në raundin e katërt.
Nurmagomedov ishte i pari që ndezi zjarret mes dy skuadrave, duke bërë shaka me atë që dukej si tërheqje nga sporti i arteve të përziera marciale nga ana e Conor McGregor.
”Nesër ai do të thotë që do të kthehet dhe gjithë mediat do të flasin për atë. Këtë e do ai”, tha Khabib kur u pyet nga gazetarët në Rusi.
”Ai nuk ka përfunduar ende. Ai nuk arriti një marrëveshje me UFC-n dhe tani po luan blofin. Conor sillet si një grua xheloze, që thotë do të lë tërë kohën, por më pas kthehet”.
McGregor nuk i priti mirë këto komente dhe lëshoi një seri të postimeve në “Twitter” ndaj kampionit të peshave të lehta në UFC. Në sulmet e tij irlandezi akuzoi 30-vjeçarin që po i frikësohet një revanshi. Më pas ai ofendoi edhe gruan e Khabibit.
Conor postoi foto të dasmës së Nurmagomedov, me përshkrimin “gruaja jote është një peshqir”. Fotoja tregonte gruan e Khabibit që kishte veshur një vello për të fshehur fytyrën e saj. Ky postim u komentua nga shumë fansa si fyerje raciste.
Dhe menjëherë pasi pa këto shkëmbime, presidenti i UFC’së, Dana White doli me një deklarata rreth çështjes.
“Jam i vetëdijshëm për shkëmbime në media mes Khabib Nurmagomedov dhe Conor McGregor. Situata e tanishme ka eskaluar në një nivel të papranueshëm.” deklaroi White.
Më pas White sqaroi se UFC me anë të instrumenteve të saj përgjegjëse po përpiqet që të qetësojë situatën e krijuar mes dy kampeve.
Gjithsesi vetëm pak pas deklaratës së Dana White, Conor sulmoi sërish Khabibin. “Befasi: poshtë peshqirit është një dhi”, postoi ”The Notorious” në Twitter, duke ofenduar sërish gruan e Nurmagomedovit.
Khabib nuk pritet të kthehet në ring deri në shtator, pasi është ende i pezulluar pas asaj që ndodhi në ndeshjen ndaj Conorit në UFC 229. “Ai është në pezullim dhe pastaj ai nuk lufton gjatë Ramazanit. Kjo bën që rikthimi i tij të bëhet në shtator”, kishte thënë Dana White.
Ndërsa McGregor pas asaj ndeshje do të jetë i pezulluar deri në 6 prill. Por e ardhmja e tij është ende e panjohur, pasi pak ditë më parë ai dha lajmin e tërheqjes nga sporti i MMA.
