Bashkimi Evropian ka zgjedhur përfaqësuesin e posaçëm për dialogun Kosovë-Serbi.
Bëhet fjalë për Miroslav Lajčák i cili është gjithashtu përfaqësues i disa çështjeve të tjera në rajonin e Ballkanit.
Lajčák është ministër i Jashtëm i Sllovakisë, vend i cili ende nuk e ka njohur pavarësinë e Kosovës, shkruan “gazeta express”.
Këshilli i BE-së, që është institucioni që ka përgjegjësinë për emërimet e përfaqësuesve të posaçëm që zakonisht emërohen për shtete dhe rajone problematike, është po ashtu në pritje të ndryshimeve të procedurave, pasi shumica e takimeve zhvillohen përmes videove online, pa praninë fizike të ministrave në Bruksel, pas përhapjes së koronavirusit të ri.
Kujtojmë se bisedimet Kosovë-Serbi janë ndërprerë që kur Kosova vendosi taksën 100 % ndaj produkteve serbe.
Për vazhdimin e dialogut midis Kosovës dhe Serbisë, të mërkurën, Përfaqësuesi i lartë i BE-së, Josep Borrell ka biseduar me kryeministrin e Kosovës, Albin Kurti.
“Përfaqësuesi i lartë dhe kryeministri diskutuan edhe dialogun e lehtësuar nga BE-ja. Përfaqësuesi i lartë përsëriti qëndrimin e BE-së se tarifat duhet të hiqen pasi ato janë një pengesë për bashkëpunimin rajonal, i cili sot është më i nevojshëm se kurrë.
Është e rëndësishme për Kosovën që të drejtojë një proces negociator përfshirës me Serbinë në formatin e dialogut të lehtësuar nga BE-ja”, ka njoftuar Komisioni Evropian pas kësaj bisede telefonike.
