Ana Paula Zacarias, Ministrja e Jashtme e Portugalisë, vendi i cili mban presidencën e rradhës në BE, ka deklaruar se nuk do të ketë çelje negociatash për Shqipërinë dhe Maqedoninë e Veriut.
Në Luksemburg, ka qenë Bullgaria e cila vendosi veton për shkak të përplasjeve me Maqedoninë e Veriut mbi pretendimet për gjuhën dhe identitetin. Po ashtu u refuzua dhe kërkesa për ta vlerësuar më vetë Shqipërinë.
“Ishte një ditë e gjatë por e mirë, kishim një takim produktiv. Morëm raportet e fundit për zgjerimin e BE .Pavarësisht të gjitha perpjekjeve nuk u bë e mundur të bihej dakord që të ketë një datë për Maqedoninë dhe Shqipërinë për çeljen e negociatave. Shpresoj që të ndodhë në presidencën tjetër”, tha ajo.
Mbledhja e Këshillit të Çështjeve të Përgjithshme në Luksemburg, nuk ka arritur të caktojë një datë për mbajtjen e Konferencës së Parë Ndërqeveritare me dy shtetet ballkanike.
Të gjitha vendet ishin pro hapjes së negociatave për Shqipërinë, madje dhe Holanda që ishte më skeptikja, votoi pro për mbajtjen e tryezës së parë ndërqeveritare.
Fati i integrimit europian të Shqipërisë, do i mbetet dialogut Bullgari-Maqedoni e Veriut, vetëm në rast se Presidenca e ardhsme sllovene e BE vendos të ndajë rrugën e dy vendeve.
