Duke qenë se pas një muaji do jepet vendimi për Shqipërisë, nëse do t’i hapen apo jo negociatat, qeveria shqiptare ka nisur përgatitjet për të bindur Brukselin se ajo është e vendosur për të luftuar korrupsionin. BE kërkon rezultate në luftën kundër korrupsionit, ndërkohë që dje Brukseli u ka dërguar të tjera mesazhe të forta politikanëve të korruptuar.
Kryetari i grupit parlamentar të PS, Taulant Balla, shprehu bindjen se qeveria shqiptare është e vendosur për të luftuar korrupsionin në nivel të lartë zyrtarësh. Gjatë një prononcimi për mediat, pas takimit me Sekretarin Parlamentar të Shtetit në Ministrinë Federale të Drejtësisë dhe Mbrojtjes së Konsumatorit, Christian Lange, Balla zbuloi se është gati një raport me emrat e personave të hetuar dhe gjykuar, që sipas tij, shumë shpejt do t’i shkojë edhe Brukselit.
“Duhet të kuptojmë se funksionimi i drejtësisë nuk bëhet me plan dhe numra funksionarësh apo përfaqësues të lartë përpara drejtësisë. Drejtësia duhet të funksionojë e pavarur nga politika. Ky ka qenë gur i themelit të funksionit të drejtësisë.
Funksioni dhe ngritja e Prokurorisë Speciale Antikorrupsion, do të shoqërohet me një regjistër të personave të nivelit të lartë që duhen hetuar dhe gjykuar paanshmërish. Gjithmonë rruga e integrimit europian shoqërohet me standarde, kushte që çdo vend duhet t’i përmbush. Edhe vendet që janë anëtare të BE, shoqërohen me kushte që duhet të përmbushen”, deklaroi ai.
Kjo deklaratë e tij nuk tregon gjë tjetër veçse se Bashkimi Europian po rrit presionet ndaj drejtësisë, në mënyrë që të intensifikohet lufta kundër pushtetarëve të korruptuar.
