Pas vendimit të BE për të mos hapur as këtë qershor negociatat me Shqipërinë, kryetari i PD-së, Lulzim Basha fajësoi kryeministrin Edi Rama dhe qeverinë e tij si përgjegjëse për lënien pas të vendit në rrugëtimin drejt Europës. Sipas tij, krimi dhe korrupsioni kanë lënë vendin pas.
“Mos u gënjeni nga propaganda e tij. Ka vetëm një përgjegjës: Rama dhe qeveria e tij. Ka vetëm një arsye: krimi dhe korrupsioni. Sot negociatat do të ishin hapur, nëse Shqipëria nuk do të ishte vendi më i korruptuar në Europë. Mos dëgjoni helmet anti-europiane.
Na dhuroi miliarda për shkolla, spitale e rrugë. Na hoqi vizat, na hapën dyert kur u derdhëm në emigracion drejt tyre. Europianët nuk kanë frikë nga shqiptarët, nga droga, nuk duan të mbajnë larg shqiptarët por politikanët e kriminalizuar. Nëse Shqipëria nuk do të ishte kthyer në qendrën e drogës, sot do të ishim duke negociuar”, u shpreh Basha.
Ai apeloi se nëse nuk reagohet tani, vendi do përfundojë në greminë. Sipas tij, zgjidhja është ‘ndëshkim përmes drejtësisë’.
