Presidentja e Komisionit Europian, Ursula Von der Leyen deklaroi ditën e sotme se Bashkimi Europian ka shpërndarë mjaftueshëm doza në vendet anëtare, që të bëhet e mundur të paktën vaksinimi i 70% të popullsisë së rritur.
Von der Lyen u kërkoi vendeve të Bashkimit Europian që të rrisin numrin e vaksinimeve dhe tha se rreth 500 milion doza do të shpërndahen në të gjithë unionin deri të dielën, shkruan US News.
”Bashkimi Europian e mbajti fjalën. Këtë fundjavë ne kemi shpërndarë doza të mjaftueshme për vendet anëtare, në mënyrë që përgjatë këtij muaji të vaksinohen 70% e popullsisë së rritur.”, tha Von der Leyen.
27 qeveritë e Bashkimit Europian janë përgjegjëse për administrimin e vaksinave te qytetarët e tyre dhe disa po punojnë shumë më shpejt se të tjerat, por von der Leyen tha se Covid-19 nuk është mundur ende.
“COVID-19 [sëmundja që e shkakton koronavirusi] nuk është mundur ende. Por, ne jemi të përgatitur t’i vazhdojmë furnizimet me vaksina – gjithashtu kundër varianteve të reja”, u shpreh Presidentja Von der Leyen.
Të dhënat e Universitetit Johns Hopkins tregojnë se koronavirusi ka prekur mbi 186 milionë njerëz në të gjithë botën. Prej tyre, mbi 4 milionë kanë vdekur.
