Ministri në detyrë për Evropën dhe Punët e Jashtme, Gent Cakaj, ka zhvilluar një takim në Tiranë me homologen e tij suedeze, Ann Linde.
Përmes një postimi në Facebook, Cakaj tregon se gjatë takimit u diskutua mbi avancimin e Shqipërisë në procesin e integrimit evropian, zhvillimet në rajonin e Ballkanit dhe sfidat e sigurisë etj.
Ministri Cakaj vlerësoi rolin mbështetës të Suedisë për procesin e zgjerimit, në përgjithësi dhe përpjekjeve të Shqipërisë, në veçanti, në këtë proces. Ai u ndal edhe në qasjen që BE ka ndaj Kosovës dhe qytetarëve të saj, sa i përket liberalizimit të vizave.
“Pothuajse si çdo herë tjetër, në takime të formatit të tillë, nënvijëzova edhe qasjen e padrejtë të BE-së karshi qytetarëve të Kosovës. Kosova ka përmbushur të gjitha kushtet teknike dhe meriton të lëvizë lirshëm pa regjim vizash, në hapësirën e Bashkimit Evropian”, është shprehur Cakaj në fjalën e tij gjatë takimit.
Postimi i plotë:
Në diskutim vlerësuam pozitivisht marrëdhëniet dypalëshe dhe konstatuam nevojën për thellim të mëtejmë të bashkëpunimit në rrafshin ekonomik. Suedia është mbështetësja e tretë financiare dhe teknike e Shqipërisë në Evropë, pas Gjermanisë dhe Zvicrës?. Shqipëria do të
vazhdojë bashkëpunimin e pakursyer e qasjen e hapur në çdo çështje dypalëshe me Suedinë.
Po ashtu, ndamë pikëpamjen se procesi i zgjerimit të BE-së në Ballkanin Perëndimor duhet të vazhdojë sa më shpejtë dhe se diskutimi mbi metodologjinë e re të negociimit brenda BE-së nuk duhet të ngadalësojë dinamikën e reformave në Shqipëri.
Shqipëria do të vazhdojë angazhimin e saj të pakursyer në rrugën drejt BE-së!
Për më shumë, pothuajse si në çdo takim tjetër, nënvijëzova qasjen e padrejtë të BE-së në raport me qytetarët e Republikës së Kosovës! Kosova ka bërë më shumë se vendet tjera dhe ka plotësuar çdo kusht për
të fituar liberalizimin e vizave. Liberalizimi i vizave është një prej detyrimeve të papërmbushura të BE-së ndaj Republikës së Kosovës.
Në fund, diskutuam edhe për Kryesinë e Shqiptare të OSBE-së 2020. U pajtuam për një bashkëpunim të hapur në këtë kuadër
shumëpalësh, si dhe ndamë po ashtu qëndrimin se Shqipëria është plotësisht e
gatshme për marrjen e Kryesisë së OSBE-së vitin e ardhshëm.
