Shqipëria e mbyll vitin 2017 me një rritje ekonomike prej 3.8 për qind. Në këtë përfundim ka dalë Banka Botërore, në raportin periodik për ekonomitë e rajonit.
Gjithashtu BB parashikon për vitin e ardhshëm një trend pozitiv në shifrat 3.6%, ndërsa në 2019-n 3.5 për qind. Sipas raportit të Bankës Botërore, Shqipëria do të ketë ngadalësim të rritjes ekonomike, si rrjedhojë e përfundimit të investimeve të mëdha të huaja dhe rritjes më të ngadaltë sesa pritej të partnerëve tregtarë.
Ndërsa për Kosovën parashikohet të ketë rritjen ekonomike më të madhe në rajon me 4.4%. Edhe dy vitet në vijim, Kosova do qëndrojë në krye të ekonomisë së vendeve të rajonit.
Raporti i Bankës Botërore
Sipas Raportit më të fundit të Rregullt Ekonomik për Ballkanin Perëndimor të Bankës Botërore (BB RRrE), i prezantuar sot në Prishtinë, të gjashtë vendet e Ballkanit Perëndimor pritet të kenë rritje ekonomike në 2017. Ndërkohë parashikohet që ritmi i rritjes rajonale të përshpejtohet në 3.3 për qind në 2018 dhe 3.6 për qind në 2019. Investimet nxitën rritje të fortë ekonomike në Shqipëri, Kosovë dhe Mal të Zi, ndërkohë konsumi çoi në një rritje të qëndrueshme në Bosnje dhe Hercegovinë. Kriza më e hershme politike në IRJ të Maqedonisë si dhe dimri shumë i ashpër në Serbi, shkaktuan tkurrje të rritjes ekonomike në këto dy vende.
“Është inkurajuese të vërejmë se afro një dekadë pas krizës financiare globale, punësimi më në fund po rim/k/mbet në nivelet e parakrizës në pjesën më të madhe të rajonit”, u shpreh Linda Van Gelder, Drejtoresha Rajonale e Bankës Botërore për Ballkanin Perëndimor. “Tani është më e domosdoshme se kurrë që vendet e Ballkanit Perëndimor të ruajnë tempin e reformave, me qëllim krijimin e mundësive dhe përmirësimin e standardeve të jetesës për të gjithë qytetar/t e Ballkanit Perëndimor”.
Rritje ekonomike, e shoqëruar me krijimin e vendeve të reja të punës, kontribuoi edhe në uljen e varfërisë në rajon. Norma e varfërisë për vitin 2017 parashikohet të jetë 23.6 për qind, që përbën një rënie me një pikë përqindje krahasuar me një vit më pare. Kjo do të thotë se rreth 124,000 njerëz kanë dalë nga varfëria gjatë kësaj periudhe.
Ndërsa perspektiva e rritjes ekonomike mbetet pozitive për vendet e Ballkanit Perëndimor, ato vijojnë të jenë ende të ekspozuara ndaj rreziqeve. Pasiguritë e politikave ose ndryshimi i kahut të tyre mund të ngadalësojnë investimet dhe rritjen ekonomike. Sipas raportit, këto rreziqe mund të zbuten nëpërmjet ruajtjes së qëndrueshmërisë fiskale duke përshpejtuar ndërkohë reformat strukturore – si forcimi i financave publike, përmirësimi mjedisit për investime dhe integrim, si dhe progresin me axhendën e anëtarësimit në Bashkimin Europian (BE).
BB paralajmëron: Rritja ekonomike e Shqipërisë do të ngadalësohet by Tirana Today on Scribd
