Oliver Kahn zëvendëson Rumenigen si administrator i kampionëve të Gjermanisë, Bayern Munchen. Pas trajnerit Hansi Flick, që zëvendësohet nga ish trajnneri i Leipzig, Nagelsmann, ka qenë administratori Karl-Heinz Rumenigge që ka lajmëruar, përmes një komunikate shtypi, largimin e tij nga Bayern, edhe pse, sipas kontratës, ai duhej të vazhdonte në detyrë deri në fund të vitit.
“Strategjikisht është momenti i duhur, mbyllet bilanci dhe në të njëjtën kohë, hapet një kapitull i ri, edhe me trajnerin e ri. Është më mirë edhe për të ardhmen e Bajernit, që sezoni i ri të nisë me Kahn, si administratorin e ri ekzekutiv,”- ka deklaruar Karl-Heinz Rumenigge nëpërmjet një komunikate për shtypin, botuar nga mediat gjermane. Portieri Oliver Kahn ishte i projektuar për këtë post kohë më parë.
Madje, në muajt e fundit ai kishte marrë përgjegjësitë për vendimet më të rëndësishme të klubit bavarez, siç ishte edhe zgjedhja e Nagelsmann si trajneri i ri i Bayern, për të cilin u paguan 25 milionë që të lihej i lirë nga Leipzig.
Vetë Rummenige nuk ka sqaruar asgjë për të ardhmen e tij, edhe pse ai ka përjashtuar mundësinë që të punojë për Federatën Gjermane të Futbollit apo për UEFA-n. Gjithsesi, ai konsiderohet si një nga administratorët më të sukseshëm në krye të klubit, të cilin e drejtonte prej tridhjetë vitesh.
