Pasi Rama njoftoi sot se vëllezërit Budina ishin me koronavirus, ka reaguar menjëherë bashkëshortja e Robertit, e cila e cilësoi deklaratën e kryeministrit të pavërtetë. Ajo ka kërkuar që ISHP të shkojë t’i bëjë testin asaj dhe fëmijëve, nëse mendon se i shoqi është pozitiv me koronavirus.
Sabina Kodra, bashkëshortja e regjisorit Robert Budina, ka kërkuar nga Instituti i Shëndetit Publik që t’i bëjnë urgjentisht testin e COVID-19.
Ajo është shprehur e revoltuar, pas publikimit të informacionit konfidencial nga ISHP për familjen dhe bashkëshortin e saj, teksa tha se kërkonte që testi i COVID t’i bëhej edhe pjesës tjetër të familjes Budina.
“Ju marr në telefon nga familja e Robert Budinës, për te cilin ju keni publikuar lajmin që është me COVID-19. Ju lutem duhet të vini t’i bëni testin mua dhe fëmijëve urgjent”, ka thënë bashkëshortja e Robert Budinës për “Panorama”.
“Ka dalë lajmi që Berti është me COVID, ndërkohë që Berti s’është fare me COVID. Kjo është gënjeshtër, kanë nxjerrë emër dhe mbiemër dhe më kanë sakatuar fëmijët. Kjo është kafshëri”, u shpreh Sabina Kodra.
Ajo ka komentuar dhe mesazhin e kryeministrit Rama. “Po sigurisht kryeministri, ai i di të gjitha ai”, tha bashkëshortja e Budinës.
