Policia greke ka vënë në pranga një 40-vjeçar shqiptar dhe dy grekë në Selanik duke transportuar drogë. Mediat greke raportojnë se kanabisi vinte nga Shqipëria dhe përveç Selanikut, synonte të tregtohej edhe në zona të tjera të Greqisë.
Shqiptari kishte marrë përsipër që të fuste drogën në territorin grek, deri në Selanik. Aty më pas e prisnin dy bashkëpunëtorët grekë 46 dhe 51 vjeç, të cilët morën në dorëzim sasinë e drogës.
Policia sekuestroi gjashtë pako të fshehura në derën e makinës me peshë totale 2 kg. Ndërsa nga kontrolli që iu bë binzesit të njërit prej grekëve u zbuluan 14 pako të tjera me 5.3 kg kanabis.
Në cilësinë e provës materiale u konfiskua makina, një peshore elektronike dhe 5 aparate celularë.
Operacioni policor u zhvillua nga Departamenti i Sigurisë në Kavalla të ndihmuar edhe nga zyrtarët e Policisë në Kozani. Ndërsa të arrestuarit iu dorëzuan autoriteteve të drejtësisë.
