Kryeministri Edi Rama, në cilësinë e kreut të OSBE-së, po zhvillon Konferencën Vjetore të Sigurisë. 6 muaj pas marrjes së kryesisë së OSBE, kreu i qeverisë tha se jo gjithçka shkon mirë në OSBE, dhe bashkëpunimi po dështon për shkak të mungesës së besimit. Në fjalën e tij, Rama ka shprehur shqetësimin se shikon një mungesë vullneti mes shteteve për të sjellë ndryshim, për një bashkëpunim të ngushtë.
“Nuk shkon gjithçka mirë në OSBE. Këto janë themelet e një sistemi ndërkombëtar, prej të cilit varemi, por këto themele po tronditen. Bashkëpunimi ynë po dështon për shkak të mungesës së besimit.
Kjo po prek themelet e sigurisë së përbashkët, sepse pa respektuar atë që kemi ndërmarrë së bashku, nuk mund të shpresojmë. Është shumë e qartë që kemi nevojë për ndryshim dhe ndryshimi duhet tani. Shoh një mungesë vullneti mes shteteve për të sjellë ndryshim, për të sjellë një bashkëpunim të ngushtë”, u shpreh Rama.
“Për fat të keq po vijon një kulturë ku shpeshherë kritikojmë aksionet e njëri-tjetrit. Le të jemi më kurajozë, të përballemi hapur me njëri- tjetrin për mënyrën se si mund të punojmë, të ndërtojmë më shumë stabilitet. Si mund ta drejtojmë OSBE drejt rrugës për t’u rimëkëmbur. Po, për t’u rimëkëmbur”, tha Rama.
