Deputeti Myslim Murrizi tha për mediat se një ditë më parë i është paraqitur Kuvendit një kërkesë për të zëvendësuar Rudina Hajdarin, si bashkëkryetare e Komisionit për Reformën Zgjedhore. Grupi parlamentar demokrat në Kuvend, së bashku me dy grupet e tjera parlamentare, kanë propozuar që znj.Rudina Hajdari të zëvendësohet dhe postin e bashkëkryetarit të Komisionit për Zgjedhoren ta marrë z.Myslim Murrizi. Ky i fundit tha se nuk bëhet fjalë për shkarkim, por zëvendësim.
“Nuk është shkarkim, ne e kemi dërguar një kërkesë të tillë më 8 vota pro dhe të mbështetur nga dy grupet e tjera, të zëvendësohet Rudina Hajdari dhe bashkëkryetar të jetë Myslim Murrizi. Nuk mund të pranojmë që nga firmosja në Këshillin Politik një marrëveshje që opozita parlamentare nuk e njeh besoj, është më e moralshme që të mos drejtohet nga dy bashkëkryetarë që janë në të njëjtin mendim dhe kundër mendimit të 29 deputetëve. Ne kemi të drejtë të kërkojmë vendin që na takon, dje ka vajtur dhe shkresa zyrtare”.
