Analisti dhe ish-ministri i Jashtëm Besnik Mustafaj ka qenë i ftuar pasditen e sotme në rubrikën “Opinion” në “News 24” prej ku ka folur ndër të tjera edhe për heqjen e pasaportës diplomatike për kreun e Partisë Demokratike Lulzim Basha.
Ai e ka cilësuar si një “hakmarrje të ulët” veprimin në fjalë: “Para 3 ditësh iu hoq pasaporta diplomatike Bashës. Heqja e pasaportës diplomatike të Bashës është hakmarrje e ulët bizantine”.
Analisti gjithashtu foli për deklaratën e kryeministrit Edi Rama i cili paralajmëroi pak më herët se kush përfshihet në krim elektoral nuk lejohet të dalë nga vendi.
Sipas Mustafajt deklarata e Ramës është tërësisht e paligjshme: “Kjo deklaratë është e paligjshme. Dalja jashtë shtetit lidhet me rrezikshmërinë që mund të kesh ti. Gjykata është ajo që merr vendimin. Lëvizja e lirë është e drejtë universale. Është një shantazh. Nuk ka asnjë mundësi që të realizohet kjo. E çon në Gjykatën e Strasburgut dhe ajo e shpartallon një vendim të tillë. Unë po të isha, e kisha lënë të fitonte në 61 bashki, por çfarë do të thoshte me 1 korrik. Kjo do të këtë kosto për të dyja palët”.
