Ish-ministri i Brendshëm Saimir Tahiri, pas një beteje më shumë se 4 vjeçare, dje Gjykata e Posaçme e Apelit ka dënuar me 5 vite burg Tahirin, duke lënë në fuqi vendimin e dhënë nga ish-Krimet e Rënda. Por ndryshe nga vendimi i Shkallës së Parë, Apeli vendosi të heqë shërbimin e provës, duke vendosur në këtë mënyrë që Tahiri të futet në qeli.
Për shkak të gjykimit të shkurtuar, ai do të duhet të vuajë 3 vite e 4 muaj burg. Kryetari i Partisë Demokratike, Lulzim Basha, ka reaguar për vendimin e gjykatës për të dënuar me burg ish-ministrin Saimir Tahiri. Përmes një postimi në rrjetet sociale, Basha shprehet se dënimi i tij fakton që akuzat e PD kanë qenë të vërteta. Nga ana tjetër, ai ka sulmuar kryeministrin Edi Rama.
“Vendimi i sotëm për Saimir Tahirin dëshmon sa të vërteta kanë qenë akuzat e PD për përfshirjen e ish-Ministrit të Brendshëm në trafikun ndërkombëtar të lëndëve narkotike. Faktet e përfshirjes së tij në një grup të strukturar kriminal, janë dëshmi e qartë se në krye të bandës është Edi Rama, njeriu që e emëroi, mbrojti dhe përdori çdo mekanizëm për të zvarritur dënimin e vartësit të tij. Saimir Tahiri dhe Lefter Koka janë vetëm dy nga hallkat e zinxhirit të krimit dhe korrupsionit, që ka për autor dhe zbatues Edi Ramën!”.
