Ish-kreu i Partisë Demokratike, Lulzim Basha, i është bashkuar ditën e sotme seancës së radhës së Kuvendit. Para hyrjes në Kuvend, ish-kreu i Partisë Demokratike Lulzim Basha është shprehur për mediat se e ka të qartë mënyrën dhe rrugën si ta kthejë PD-në në krye. Me një mesazh të koduar, ai ka thënë se ujërat janë të turbullt, por do të sqarohen shumë shpejt.
“Unë e kam të qartë rrugën për të rikthyer PD në vendin e duhur. Ujërat mund të jenë të turbullt, por shumë shpejt do të sqarohen”, tha Basha.
Ai ndër të tjera premtoi se do të punojë që PD-ja të rikthehet në shpresë dhe alternativë për qytetarët.
“Por jo të heq dorë nga përgjegjësia ime ndaj demokratëve dhe shqiptarëve. PD-ja duhet të kthehet në një alternativë dhe shpresë për njerëzit. Do punoj ditë për ditë që PD-ja të kthehet në shpresë dhe aleternativë për njerëzit, alternativë që nuk duhet të jetë në kundërthënie me aleatët tanë.
Një nga arsyet e aktit tim ka qenë pikërisht tejkalimi i interesave personale, për t’i dhënë mundësi që të diskutojmë dhe vendosim pa qenë në presion. Kjo ka qenë dhe arsyeja që vendosa të mos marr pjesë në mbledhjen e sotme”, përfundoi Basha.
