Dje, kryedemokrati Basha ka thirrur në zyrë krerët e degëve të Fierit. Mësohet se arsyeja e kësaj mbledhje ka qenë organizimi për të sfumuar “Foltoren” e ish-kreut demokrat Sali Berisha. Kreu i PD-së, Lulzim Basha ua ka bërë të qartë krerëve të PD-së të Fierit, që të vënë në dijeni anëtarësinë dhe bazën se vendimi i përjashtimit të Berishës nga grupi parlamentar i Partisë Demokratike ishte përgjegjësia e tij dhe një vendim i duhur.
Po të njëjtat burime bëjnë me dije se kryedemokrati Basha ka kërkuar nga vartësit e tij që jo vetëm të mos mbështesin Berishën, por nuk duhet të lejojnë asnjë demokratë që t’i bashkohet tubimit të sotëm të ish-liderit demokrat.
Duket se Basha është i vendosur për të mbajtur ish-kryeministrin Sali Berisha sa më larg Partisë Demokratike dhe forumeve të saj.
Basha e përjashtoi ish-kryeministrin Berisha nga grupi parlamentar, dhe shkak për këtë u bë vendimi i Departamentit Amerikan të Shtetit, që ka shpallur ish-liderin demokrat person “non grata”. Berisha ka nisur një tur takimesh me bazën demokrate, të cilin e ka quajtur “Foltorja”, që ka për synim një PD më të bashkuar, më të fortë, më të hapur.
