Kreu i Partisë Demokratike, Lulzim Basha, u ka nisur një email anëtarëve të Këshillit Kombëtar, Kryesisë, dhe ish-deputetëve, duke u përcjellë disa porosi lidhur me strategjinë e komunikimit brenda PD-së. Në një ndër kërkesat e parashtruara ishte porosia e lidershipit demokrat për demokratët, ku u kërkon që të mos pranojnë të jenë pjesë e disa mediave, apo të marrin pjesë nëpër diskutime në to.
“Po i përdor demokratët kundër nesh”, zbulohet e-maili sekret i PD-së
Ndër të tjera Basha sulmon haptazi edhe gazetarin Sokol Balla, duke e quajtur detyrën e tij të re në televizionin ‘News 24’ si ‘rol i shpifësit publik kundër PD-së’.
“Për të sulmuar me shpifje dhe të pavërteta PD dhe lidershipin e saj, Edi Rama, pas konsumimit të madh të Mero Bazes/Temës, Skënder Minxhozit/Javanews, prej shumë vitesh në shërbim të pushtetit të Edi Ramës, ka hedhur në skakierën antiopozitare edhe Sokol Ballën me portalin RealStory.
Detyra e tij e posaçme është të marrë rolin e shpifësit publik kundër Partisë Demokratike, duke i shërbyer propagandës antiopozitare, diversioneve dhe sulmeve kundër opozitës, Partisë Demokratike dhe lidershipit të saj”.
