Kryedemokrati Basha, ka shprehur sërish shqetësimin mbi situatën me COVID-19. Në një bashkëbisedim me gazetarët, ai tha se edhe transparenca për COVID është kthyer në funksion të propagandës. Basha zbuloi se në spitalin e Matit janë mbyllur disa pavione, për shkak të përhapjes së infeksionit.
“Ekipi i shëndetësisë pranë PD, kanë marrë një numër shumë të madh raportimesh nga familjarë me simptoma COVID dhe u refuzohet tamponi. Numri i të infektuarve që raportohet, është shumë më i ulët se numri real i tyre.
Numri i fataliteteve, po ashtu më i lartë seç raportohet. Edhe transparenca për COVID është kthyer në funksion të propagandës.
Vetëm në spitalin e Matit janë mbyllur disa pavione, për shkak të përhapjes së infeksionit. Situatë e ngjashme raportohet në spitalet rajonale, ndërsa siç raportoni ju, në spitalet kryesore të Tiranës është kthyer në një problem kronik. Ky është problemi i madh që po përballen shqiptarët”, tha Basha.
