Pas deklaratës së kryetares së LSI-së, Monika Kryemadhi, edhe kryedemokrati Basha ia faturoi fajn qeverisë në lidhje me vjedhjen e thasëve me lekë në Rinas.
Kreu i PD-së, edhe një herë tjetër përsëriti akuzat se bandat po bëjnë namin, dhe se policia nuk bën lëvizjen më të vogël, kjo me urdhër të Ramës.
Në një prononcim nga selia blu, Basha tha se me rënien e shtetit, ia faturuan fajin një kompanie private. “48 orë pas tronditjes së Shqipërisë dhe të mbarë botës nga grabitja e armatosur në Rinas, pyetjet janë shtuar dhe përgjigjet mungojnë. Rama po mundohet që dështimin e policisë dhe qeverisë dhe rënien e shtetit para krimit, t’ia faturojë një kompanie private.
Si për çdo gjë tjetër, fajin e kanë të tjerët. Ai as që e vret mendjen. Mendja e tij është si të vjedhë dhe grabisë Shqipërinë me oligarkët. Ngjarja e Rinasit jo e shkëputur dhe as e vetmja. Pjesë e zhvillimeve në gjithë Shqipërinë, pjesë e rrëmbimeve në Vlorë, grabitjet me armë të bizneseve, postave, vrasjet dhe rrëmbimet e bankierëve kanë filluar me instalimin e Edi Ramës në pushtet”, deklaroi Basha.
