Kryetari i Partisë Demokratike, Lulzim Basha deklaroi se Shqipëria nuk ka alternativë tjetër përveç ndryshimit.
I ftuar në Çim Peka Live, Basha u shpreh se ekonomia është në krizë, madje ishte në krizë edhe para pandemisë.
Sipas tij, 7 vitet e qeverisjes së kryeministrit Edi Rama kanë sjellë vetëm dështim.
“A ka alternativë tjetër Shqipëria përveç ndryshimit? Përgjigjen merreni nga goja e shqiptarëve që kam takuar në çdo qytet dhe qindra fshatra ku kam zhvilluar takime. Shqiptarët duan ndryshim. Edhe ata që janë simpatizantë të PS, janë të bindur se ndryshimi është e vetmja rrugë. Ndryshimin nuk e ndal askush, as unë. Ndryshimi është PD. Ky nuk është basti im personal. Unë nuk vë baste politike. Unë i shërbej deri në fund atij që është interesi më i mirë i shqiptarëve. Kupa është mbushur dhe është derdhur. Boll më!
Nuk kam premtuar mrekulli, as premtime boshe. Kam premtuar normalitet. Pas ndryshimit, normaliteti do jetë norma në qeverisje, në ekonomi dhe në familjet shqiptare. Rama nuk ka zgjidhur probleme, vetëm ka akumuluar. Prandaj edhe socialistët janë të bindur se e vetmja zgjidhje është ndryshimi. Kushti i vetëm që shqiptarët është që të mos ketë vetëm rotacion karrigesh, por t’i jepet fund tranzicionit. Rama përmblodhi në shtatë vite të gjitha veset dhe dështimet e 30 viteve tranzicion. Kjo është sfida jonë kryesore,” tha Basha.
