Lideri i Partisë Demokratike, Lulzim Basha, paralajmëroi nga Rrogozhina se do të realizohet konfiskimi i parave për të gjithë oligarkët që vazhdojnë të vjedhin paratë e shqiptarëve. Basha nuk ka hezituar të hedhë akuza edhe ndaj kryeministrit Rama, duke u shprehur se po i afrohet dita e largimit.
“Ndryshim sistemi do të thotë që deputetët e ardhshëm të Shqipërisë, nuk do të përcaktohen më nga një njeri, por do jenë prodhim i vullnetit të qytetarëve. Ju do i përcaktoni kandidatët e ardhshëm të PD në Kuvendin e Republikës së Shqipërisë. Në këtë mënyrë ata nuk do jenë njerëz pa emër, fytyrë që ngrejnë thjesht kartonin. Fati i tyre lidhet vetëm me votuesin, vetëm me qytetarin.
Do garantojmë që Parlamenti të mos jetë më noteri i qeverisë, por mbrojtës i interesave tuaja”. Basha u shpreh se sistemi i ri politik synon të varrosë fenomenin e Edi Ramës.
“Beteja jonë është për të varrosur njëherë e mirë fenomenin e Ramës, pushtetarit batakçi, të lidhur me krimin që shkatërron ekonominë, futet në shtëpitë tuaja, në xhepat tuaja për të pasuruar veten e tij dhe një grusht njerëzish”, deklaroi Basha.
