Pas dorëheqjes së Lulzim Bashës, Enkelejd Alibeaj do të jetë kryetari i komanduar i Partisë Demokratike. Vendosja e tij në drejtimin e përkohshëm të Partisë Demokratike deri në zhvillimin e zgjedhjeve ku do të zgjidhet kryetari i ri i partisë, u bë në bazë të nenit 46, pika 4 të statutit të PD. Sipas statutit, kryetar i komanduar zgjidhet nënkryetari i partisë, ku në PD kishin ngelur dy, Jorida Tabaku dhe Enkelejd Alibeaj.
Deputeti demokrat Ervin Salianji ka lëshuar dje një deklaratë të fortë. Ai tha se do të japë dorëheqjen nëse Lulzim Basha rikandidon sërish për kryetar të PD-së.
“Si rikandidon? Po jep dorëheqjen, jep dorëheqjen, nëse rikandidon, të vazhdojnë të dy këtë betejë. Unë personalisht nuk e ndjek dot këtë punë. Të vazhdojnë dhe ta shkatërrojnë, këtu do jemi.
Nëse qëndrohet në llogore me të dy palët, këtu do të jemi. Shpresoj të përgënjeshtrohem, do të vijnë zgjedhjet lokale dhe nëse bëhen truke, mos presim të çojmë dhe njëherë njerëzit në përplasje”, tha Salianji në emisionin “Opinion”.
