Kreu i Partisë Demokratike, Lulzim Basha bën përgjegjës kryesor kryeministrin e vendit Edi Rama për largimin masiv të shqiptarëve.
Sipas Bashës, Rama e ka kthyer Shqipërinë në një vend të krimit dhe korrupsionit dhe për këtë arsye shqiptarët po largohen për të shpëtuar veten dhe fëmijët e tyre.
Ky eksod sipas Bashës favorizon vetëm pushtetarët e korruptuar. Ndërsa Rama sipas tij nuk ka asnjë breje të ndërgjegjes.
“Ky është një kryeministër që nuk e bren ndërgjegjja asnjë sekondë për faktin se braktisja e vendit është veprim i dëshpëruar nga mungesa e mundësive dhe e shpresës. Shqiptarët ikin për të shpëtuar veten dhe fëmijët e tyre nga varfëria dhe injoranca; ikin për të shpëtuar nga droga dhe krimi që pasi pushtoi politikën, tani po pushton ekonominë duke u bërë kërcënim për pronën dhe jetën e çdokujt. Shqiptarët ikin nga vendi ku qeveria dhunon në mënyrë sistematike të pamundurit dhe të pambrojturit dhe favorizon e mbështet vetëm kriminelët dhe grabitqarët”, shkruan Basha në profilin e tij zyrtar në Facebook.
