Basha: Rama do ta bëjë Shqipërinë më keq se Bangladeshi

Kryetari i Partisë Demokratike, Lulzim Basha zhvilloi një bashkëbisedim me biznese në fushën e përpunimit të drurit në Shkodër.

Gjatë fjalës së tij, Basha komentoi deklaratën e kryeministrit Edi Rama, për marrjen e punëtorëve nga Bangladeshi, për shkak se disa biznesmenë janë ankuar për mungesën e krahut të punës në vend.

Sipas Bashës, Rama nuk do marrë punëtorë nga Bangladeshi, por do ta bëjë Shqipërinë më keq se Bangladeshi.

Ndër të tjera, Basha u shpreh se kjo qeveri po çon vendin në greminë, duke shtuar se thirrja për ndryshim dëgjohet anembanë Shqipërisë.

Lulzim Basha: ”Shqipëria sot është kapur nga korrupsioni dhe këtë e thonë organizmat ndërkombëtarë. Shtetet e rajonit kanë dhënë shumë para për të marrë veten nga pandemia, kurse ju keni paguar nga xhepi juaj. Plani ynë sheh taksa më pak sesa vendet e rajonit. Ju jeni shpresa për të bërë këtë vend.

Ky njeri nuk do marrë punëtorë nga Bangladeshi, por Rama do ta bëjë Shqipërinë më keq se Bangladeshi.  Mbyllinii derën këtij njeriu dhe lëreni Shqipërinë të shkojë në BE. Ne do mendojmë për bizneset, për njerëzit e thjeshtë e punëtorë të vendit. Do jemi partner me sipërmarrjen. Do të ndalim emigracionin masiv, që është plaga më e madhe e vendit. Punësimi i rinisë me paga të mira do bëhet realitet”.

Shkodra, për shkak të diskriminiimit politik e ekonomik, e ka përjetuar thellë krizën e rëndë 8-vjeçare. Shqipëria po zbrazet dhe biznesi po vuan. Të vazhdon këtë rrugë do të thotë të shkosh me këmbët e tua drejt greminës. Thirrja për ndryshim dëgjohet në të gjithë Shqipërinë, nga çdo grup shoqëror.”