Pas takimit të mbajtur sot me aleatët, Basha paralajmëroi një tjetër dosje me përgjime të Prokurorisë, si ajo ‘339’ në të cilën rezulton i përgjuar edhe kryebashkiaku i Durrësit, Vangjush Dako. Kryetari i PD-së, Lulzim Basha u shpreh se ekziston edhe dosja ‘184’. Të dyja këto dosje, tha Basha, do të zbardhen dhe do të zbulohen politikanët e inkriminuar. Në vazhdën e akuzave, ai shtoi se politikanët së bashku me bandat kriminale do të përballen me drejtësinë.
“Edi Rama! Dosja ‘339’ është makthi yt! Ti e di fare mirë se përtej minutave që janë botuar nga ‘Zëri i Amerikës’ dhe nga ‘BIRN-i’, çfarë përmban ajo dosje. Uroj ta dish se çfarë përmban dhe dosja ‘184!’ Të dyja këto dosje do të zbardhen!
Drejtësisë do t’i zgjidhen duart! Të gjithë politikanët e përfshirë me kokat e krimit të organizuar do të shkojnë para drejtësisë, dhe shqiptarët do të kenë zgjedhje të lira dhe të ndershme’, tha kreu i opozitës, Lulzim Basha.
Dosja ‘184’ e Prokurorisë i përket qarkut të Dibrës. ‘Do kemi kohë për të zbuluar çdo informacion që na vjen, dhe natyrisht detyra dhe nderi ua kërkon që këtë pyetje t’ia bëni Prokurorisë, sikundër t’i pyesni pse janë vonuar hetimet, pse nuk zbardhen dosjet’, tha Basha për gazetarët.
