Basha: Do të kthejmë sundimin e ligjit, jo të bandave

Për kryetarin e Partisë Demokratike, Lulzim Basha zgjedhjet e 25 prillit nuk do të jenë për forcat politike, por për shqiptarët.

I ftuar në emisionin ”Open”, Basha u shpreh se 25 prilli do të shërbejë për të kthyer sundimin e ligjit dhe jo të bandave.

Lulzim Basha: ”Këto zgjedhje nuk janë as për Partinë Demokratike as për Partinë Socialiste. Këto zgjedhje janë për shqiptarët dhe Partia Demokratike me programin e vet, me ekipin e vet dhe me të gjithë organizimin e vet është në funksion të zgjidhjeve për shqiptarët.

Le te mos bëjmë avokatin e krimit, sepse na bashkon një vullnet për fëmijët tanë, për të ardhmen tonë, për të ardhmen e Shqipërisë, për të hapur ato negociata pesë prej kushteve kanë të bëjnë me sundimin e ligjit. Që të kthejmë sundimin e ligjit dhe jo sundimin e bandave. Ky është qëllimi jonë, ky është ndryshimi për të cilin i ftoj shqiptarët.

Kurrë më parë nuk ka qenë përballja midis një njeriu dhe një pakice që ka përfituar nga pushteti i tij dhe një shumice absolute ku janë tashmë jo vetëm demokratët por edhe socialistët, vëllezërit dhe motrat tona. Edhe administrata publike që e kuptojnë se këtij i ka ardhur fundi dhe me 25 prill do t’i vijë fundi politikisht me votën më masive popullore.

Janë zgjedhjet më të rëndësishme dhe do të kenë pjesëmarrjen më masive. Ndërsa ne zoti Kikia do të kemi fitoren më të thellë si forcë politike, si koalicion. Fitoren që në fakt do t’i takojë gjithë shqiptarëve.”