Kryedemokrati Lulzim Basha, ka vijuar turin e takimeve me banorë të Sukthit, të cilët sipas tij, vuajnë ende pasojat e tërmetit dhe harresën e shtetit në kohën e pandemisë. Ai shigjeton Ramën, si përgjegjësin e vetëm që ka goditur rëndë këtë zonë, e ndërsa banorët ndjehen të braktisur. Në morinë e akuzave, kreu i PD-së shprehet se Rama dhe oligarkët e tij kanë vetëm një qëllim, të vjedhin taksat e shqiptarëve për t’u pasuruar në kurriz të qytetarëve të braktisur.
“Sukthi dhe banorët e tij ende vuajnë pasojat e tërmetit të nëntorit. Asnjë ndihmë për banorët me shtëpitë e shkatërruara, asnjë kujdes për situatën e pandemisë që i ka çuar në varfëri të tejskajshme banorët e Sukthit.
RAMAVIRUSI ka goditur rëndë këtë zonë dhe banorët e saj që sot më shumë se kurrë ndihen të braktisur dhe të lënë në harresë. Shtëpi të rrënuara dhe në pragshembje pas tërmetit, asnjë ndihmë financiare apo ushqimore, varfëri e shtuar, papunësi dhe mjerim. Kjo është gjendja e Sukthit sot.
Alarmi i qytetarëve që takova në Sukth është dëshmi e qartë e pandemisë ekonomike që ka prekur shqiptarët. Rama i ka braktisur shqiptarët. Ai dhe oligarkët e tij kanë vetëm një qëllim, të vjedhin taksat e shqiptarëve për t’u pasuruar në kurriz të qytetarëve të braktisur pa ndihmë dhe kujdes”.
Një ditë më parë, Basha u gjobit për shkelje të rregullave të COVID-19. Bëhet fjalë për takimin që pati me disa tregtarë e qytetarë në një kafe.
Kryedemokrati është ndëshkuar si organizator i këtij takimi. Ndëshkimi i Bashës është komentuar edhe nga kryeministri Edi Rama, i cili tha se është gjëja e duhur për aq kohë sa ka shkelur rregullat.
“Qeveria përcakton vendime, por nëse janë gjobitur është bërë gjëja e duhur kur shkeljet konstatohen. Më vjen keq për ata që u morën për figurantë”, tha Rama në emisionin ‘Opinion’.
