Në një takim me mbështetësit në Fier, kreu i PD-së, Lulzim Basha, tha se Rama ka frikë hapjen e negociatave, dhe se në Europë nuk shkohet me dy standarte. Në ndalesën e radhës që është në Fier, me tone të larta, kryedemokrati Basha fajësoi kryeministrin Rama, ndërsa i kujtoi se një vit më parë gënjeu për negociatat.
“Nga njëra anë, një kryeministër ilegjitim i ardhur në pushtet me votat e krimit dhe paratë e drogës, një njeri që po bën gjithçka të vonojë hapjen e negociatave.
Në anën tjetër jemi ne, PD, opozita e bashkuar, janë të gjithë shqiptarët. Jemi të gjithë bashkë dhe ne e bëjmë këtë betejë për vlerë evropiane, për standarde evropiane, për Shqipërinë e gjithë shqiptarëve, dhe jo për një grusht hajdutësh e kriminelësh.
Ka veç një rrugë drejt Shqipërisë Europiane: Edi Rama duhet të largohet, sepse Shqipërinë e shndërroi në hambar droge dhe krimi. Sepse ekonomia u kap nga paratë e krimit, sepse helmoi fëmijët me gaz lotsjellës kur prindërit mbronin shtëpitë e tyre, iu dha oligarkëve paratë e shqiptarëve, sepse tradhtoi integritetin e Kosovës, sepse e la vendin pa gjykata, sepse me Dakon e Gjiknurin vodhën votat.
Boll më me Shqipërinë që duan ata. Koha është tani për Shqipërinë e shqiptarëve”.
Basha foli për ndryshime kushtetuese, për ndryshim rrënjësor të sistemit. Sipas tij, duhet që deputetët të zgjidhen me lista të hapura. Po kështu, Presidenti të votohet nga populli, si dhe të sanksionohen referendumet jo vetëm në nivel kombëtar, por edhe në nivel vendor.
