Kryetari i Partisë Demokratike, Lulzim Basha deklaroi se do të jetë ai kryeministri i ardhshëm nëse opozita fiton zgjedhjet e 25 prillit.
I ftuar në emisionin “Opinion”, Basha u shpreh se kjo është një preferencë e qytetarëve që të jetë ai në krye të qeverisë, por edhe një vendim i koalicionit.
“Unë jam kandidati për kryeministër i të gjithë opozitës. Është një vendim i shpallur, jo vetëm si vendim i koalicionit, por edhe i pëlqimit të qytetarëve. Shihet në terren se qytetarët kanë një preferencë të qartë që unë të jem kryeministri i ardhshëm.
Po vjen ora për ndryshim, për të larguar këtë qeveri dhe për të vendosur një standard të ri. Do jenë vendime taktike, për të cilat ne po konsultohemi. Ne kemi një preferencë të vetme të gjithë. Jemi në fund të rakordimeve politike, për të bërë atë që është e nevojshme në nivelin taktik. Të bëjmë të mundur që asnjë votë të mos shkojë kot. Në funksion të këtij qëllimi do shfaqim edhe taktikën tonë”, tha Basha.
