Kryetari i Partisë Demokratike, Lulzim Basha zhvilloi një takim me fermerët në fshatin Dvoran të Korçës.
Fermerët u ankuan tek Basha për mungesën e ndihmave nga shteti, e ndër problemet më madhore nënvizuan mungesën e frigoriferëve dhe tapitë e tokave që ende nuk i kanë marrë.
Gjatë fjalës së tij, teksa prezantoi programin e PD-së për këtë kategori, Basha u shpreh se në mandatin e parë qeverisës, do të jepen 100 milionë euro subvencione për fermerët.
Lulzim Basha: ”Në katër vjeçarin e parë do të japim 100 milionë euro subvencione për fermerin shqiptarë. Do ta vendosim pra në pozita të barabarta me fermerin e Maqedonisë së Veriut dhe të Kosovës të paktën. Ata e marrin mbështetjen nga shteti dhe e sjellin me çmim më të ulët. Normalisht qytetari shqiptarë edhe po mos të ishte në këtë krizë të thellë ekonomike që është do të zgjedhë një çmim më të arsyeshëm. Imagjinoni tani që kriza ua ka zbrazur xhepat.
Sapo thamë janë dhjetëra mijëra familje shqiptare që janë futur në borxh, në borxh për të paguar ilaçet e COVID-it. Agroturizmi është një nga degët që po rritet më fuqishëm në Europë. Dhe këto janë zona të mrekullueshme ku me pak investim, me disa grande qeveritare apo grande nga BE-ja. Grante nga BE-ja, të bëjnë të mundur ndërtimin e bujtinave apo restoranteve. Këto janë problemet e vërteta dhe këto do të kenë zgjidhje të drejtpërdrejta.”
