Kryetari i PD-së Lulzim Basha ka reaguar së fundmi përmes një postimi në rrjetin social Facebook, lidhur me shqiptarët që kanë mbetur në tokën neutrale Shqipëri-Greqi.
Për shkak të mbylljes së kufijve, si një masë për të ndaluar përhapjen e koronavirusit, shqiptarët nuk munden që të kthehen në atdhe.
Basha e ka cilësuar ndalimin e tyre për të hyrë në Shqipëri, një akt kriminal dhe të papërgjegjshëm.
Reagimi i plotë i kreut të opozitës: “Mbyllja e kufirit për dhjetëra shqiptarë në tokën neutrale Shqipëri-Greqi dhe ndalimi i tyre për të hyrë në atdhe e për tu kthyer në shtëpitë e tyre, është një akt kriminal dhe i papërgjegjshëm.
Qeveria shqiptare është përgjegjëse për jetën e çdo shqiptari. Kushtetuta e Shqipërisë e detyron qeverinë të mos lërë pa atdhe asnjë shqiptar. Ata nuk mund të trajtohen kurrësesi si refugjatë nga shteti i tyre.
Tragjedia që po luhet prej 4 ditësh para syve tanë me jetët e dhjetëra shqiptarëve duhet të marrë fund sot!”
