Kryetari i PD-së Lulzim Basha nesër do të mbledhë Kryesinë dhe Këshillin Kombëtar të Partisë Demokratike.
Pikërisht ditën e nesërme do të shqyrtohet ngritja e Komisionit të Vlerësimit të Kandidatëve.
Komisioni do të ketë 5 persona në përbërjen e tij dhe do të asistohet nga Sekretariati ndihmës i Komisionit, i përbërë nga dy persona.
Raportohet se Komisioni është konceptuar që të ketë në përbërje jo vetëm ish-drejtues të lartë të PD, por edhe personalitete të shoqërisë civile dhe medias, përfaqësues të botës akademike, etj.
Ky Komision bën vlerësimin e çdo kandidati, nëse përmbush apo jo kriteret e parashikuara me detaje në udhëzimin për funksionimin e procesit.
Korpusi i njerëzve me influencë, me mbështetje, me aftësi në fusha të ndryshme, që do të përzgjidhen nga Komisioni, do t’i shkojnë më pas për votim anëtarësisë së Partisë Demokratike.
Gjithashtu, gjatë këtij muaji, demokratët pritet të merren me finalizimin e programit qeverisës dhe përgatitjen e strukturave për zgjedhjet.
