Kreu i Partisë Demokratike Lulzim Basha ka shpjeguar se përse e përfshiu liderin historik të kësaj force politike, Sali Berisha, në listat e kandidatëve për deputetë në zgjedhjet e 25 qershorit.
Sipas Bashës, lista e këtyre zgjedhjeve sjell një frymë të re, edhe pse në të bën pjesë ish-kreu i PD-së, Sali Berisha, i cili është pjesë e kastës së vjetër në selinë blu, ku shumica prej tyre u lanë jashtë nga Lulzim Basha.
Megjithatë, Basha justifikohet se Berisha përbën një simbol për historinë e Partisë Demokratike ndaj nuk mund ta lija dot jashtë garës së zgjedhjeve parlamentare.
“Nuk mund të ketë njerëz të përjetshëm në politikë. Lista synon qarkullimin e elitave. Kemi dy profesorë-doktorë, Valentina Duka dhe Romeo Gurakuqi. Lista i përket vendimit tim dhe unë i qëndroj vendimit tim. Lista është një kombinim i të rinjve me atë që kanë një përvojë të gjatë në PD. Berisha është larguar nga të gjitha funksionet drejtuese në PD. Përfshirja e Berishës është në kuadrin e një simbolike, që lidhet me historinë e PD-së, me pluralizmin dhe demokracinë e pas viteve ’90. Ai ka një vend në listat e PD pasi ai ka histori të gjatë në PD. Lista një është një mozaik i kombinimit të të rinjve me përvojën. Unë ia kam dalë me këtë”, theksoi Basha në emisionin Top-Story në Top Channel.
Basha iu është shmangur akuzave të Jozefina Topallit dhe Arben Imamit se ai është duke shkatërruar PD-në, me lënien e tyre jashtë listave.
“Unë nuk merrem me komente dhe shpjegime. Janë vendime të vështira dhe unë mora vendimet e duhura. Lista është një premtim të cilin ua kisha dhënë më parë qytetarëve. Ky ekip fitues do t’i japë shqiptarëve atë që meritojnë”, u shpreh Basha.
