Në këtë situatë pandemie që po përjetojmë, kryedemokrati Basha ka zgjedhur që të dalë në terren, duke monitoruar situatën bashkë me uniformat blu. Kreu i PD-së, Lulzim Basha ka kërkuar që të jepet shpërblim për të gjithë efektivët e policisë që janë në krye të detyrës, në një kohë kur vendi po përballet me koronavirusin.
Ai shkruan në postimin e radhës në Facebook, se është dëshmitar për kushtet e vështira në të cilat ata punojnë. Basha shton më tej se pas bluzave të bardha, punonjësit e policisë janë në vijën e parë, dhe ndër më të ekspozuarit ndaj rrezikut.
Statusi
Mbështes plotësisht kërkesën e drejtë të Sindikatës së Policisë për shpërblim suplementar për punonjësit e policisë.
Ashtu si çdo qytetar i këtij vendi jam dëshmitar për kushtet e vështira në të cilat ata po punojnë. Pas personelit shëndetësor, punonjësit e policisë janë në vijën e parë dhe ndër më të ekspozuarit ndaj rrezikut. Ata janë në shërbim me dhe pa orar në të gjithë vendin.
I bëj thirrje qeverisë që të gjejë mundësinë për të akorduar shpërblim financiar për punonjësit e policisë në krye të detyrës, dhe u kërkoj qytetarëve bashkëpunim të plotë dhe mirëkuptim e mbështetje për punonjësit e policisë në mënyrë që bashkarisht dhe duke u mbështetur tek njeri-tjetri ta tejkalojmë këtë situatë me sa më pak dhimbje.#ditemetemira
