Kryedemokrati Basha ka emëruar si drejtues politik në Shkodër deputetin Enkelejd Alibeaj, pas dorëheqjes së Helidon Bushatit. Basha ka zgjedhur si drejtues politik të qarkut Shkodër, Nënkryetarin e PD dhe Kryetarin e Grupit Parlamentar, Enkelejd Alibeaj.
Një prej gjashtë Bashkive që do të ketë zgjedhje më 6 mars është pikërisht ajo e Shkodrës. Bushati i ka dorëzuar dorëheqjen Bashës edhe me argumentin se në Shkodër duhet një figurë më konsensuale për të bashkuar demokratët.
Deklarata e plotë:
Duke e konsideruar qarkun Shkodër si një nga qarqet më të rëndësishme për Partinë Demokratike, Kryetari i Partisë Demokratike ka vlerësuar se qarku Shkodër ka të domosdoshme drejtimin nga një funksionar i lartë i PD dhe ka zgjedhur si Drejtues Politik të qarkut Shkodër, Nënkryetarin e PD dhe Kryetarin e Grupit Parlamentar z. Enkelejd Alibeaj.
Duke falenderuar z. Helidon Bushati për rolin dhe përgjegjësinë e marrë në drejtimin e qarkut gjatë betejës elektorale të 25 Prillit dhe fokusimin e tij aktual tek beteja parlamentare kundër regjimit të korruptuar të Edi Ramës, Kryetari i PD shpreh bindjen se me drejtimin e ri politik, Partia Demokratike në Qarkun e Shkodrës do të jetë bastion i fuqishëm i PD dhe në krye të fitores së PD në gjithë Shqipërinë.
