Kryetari i PD-së, Lulzim Basha, ka caktuar si drejtues politik të qarkut Gjirokastër, anëtarin e Kryesisë së partisë Roland Bejko. Është Sekretari i Përgjithshëm, Gazment Bardhi, i cili ka njoftuar kryetarët e degëve në këtë qark se Bejko do të jetë drejtuesi i ri politik, i caktuar nga Lulzim Basha.
Bejko u godit nga protestuesit e thirrur nga Sali Berisha, në protestën e 8 janarit, në selinë e Partisë Demokratike. Gjithçka ka ndodhur teksa Bejko iu afrua selisë së PD-së, me qëllim futjen brenda saj, por menjëherë është rrethuar nga mbështetësit e Berishës të cilët e shtynë, goditën dhe fyen duke i kërkuar që të largohej prej aty. Sipas tij, fjalori denigrues ndaj tij vjen nga persona të cilët janë mbështetës të ish-kryeministrit Berisha.
Njoftimi i plotë
Të nderuar Kryetarë,
Në mbështetje të nenit 33 të Statutit të Partisë, ju informoj se Kryetari i Partisë ka caktuar si Drejtues Politik të qarkut Gjirokastër, anëtarin e Kryesisë së PDSH z. Roland Bejko.
Në këtë mënyrë z. Bejko do të jetë edhe Kryetar i Këshillit Koordinues të Qarkut, që është struktura e përhershme me përgjegjësi në organizimin elektoral dhe aksionet e veprimtaritë politike të PDSH në nivel qarku.
Sekretari i Përgjithshëm
Gazment BARDHI
