Kreu i Partisë Demokratike, Lulzim Basha gjatë një interviste për “Radio Europa e Lirë”, është shprehur se përgjimet e publikuara nga gazeta gjermane “Bild” dëshmon kapjen e shtetit nga krimi dhe shkrirjen e institucioneve shtetërore.
Basha ka deklaruar se kriza politike në Shqipëri nuk mund të kalojë me një marrëveshje të zakonshme mes palëve, apo pazare mes partive.
Kryedemokrati shtoi se kriza do të marrë fund vetëm atëherë kur do të ndëshkohen nga drejtësia politikanët e lidhur me krimin dhe kriminelët të cilët kanë vjedhur zgjedhjet.
“Kriza politike ka tre dimensione, kapjen e pushtetit në një dorë, ajo që quhet autokracia. Të gjitha pushtet janë në dorë të një njeriu, qeveria, parlamenti, drejtësia, mediat janë të kapura, ekonomia është monopolizuar dhe është në duar e të njëjti pushteti. Publikimet më të fundit të gazetës prestigjioze “Bild” dëshmojnë jo thjeshtë kapjen e shtetit nga krimi, por shkrirjen e krimit, partisë në pushtet, institucionet shtetërore në një.
Zgjidhja e kësaj krize politike nuk mund të kalojë thjesht e vetëm me një marrëveshje të rëndomtë politike, më një pazar mes palësh. Nuk mund të ketë zgjidhje të kësaj krize pa drejtësi dhe pa i dhënë fund pa ndëshkueshmërisë së politikanëve të lidhur me krimin dhe kriminelëve që së bashku kanë asgjësuar procesin politik dhe kanë vjedhur zgjedhjet”,-tha Basha.
Basha ripërsëriti se zgjedhje më 30 qershor nuk mund dhe nuk do të ketë me një parti të vetme dhe se ftesa e kryeministrit Edi Rama për dialog të brendshëm politik është vetëm “hedhje hi syve” të qytetarëve.
“Ftesat për dialog që bën për dialog apo për sy e faqe nuk janë ftesa, por bëhen për t’i hedhur sy qytetarëve”, u shpreh Basha.
