Nga Shkodra, kreu i PD-së Basha u përcolli mesazhe të qarta delegacionit të Parlamentit Europian, të cilët u shprehën se opozita po pengon rrugën e Shqipërisë drejt BE. Pas takimit me kryesinë e PD në Shkodër, Basha tha se rrugën e Shqipërisë drejt Europës e pengon blerja e votës, krimi dhe korrupsioni. Në vazhdën e akuzave, Basha u shpreh se në Parlament ka vetëm banda kriminale, dhe se një nga tre deputetë është produkt i bashkëpunimit të Ramës me krimin e organizuar.
“Ne e bëjmë këtë sakrificë për të zhbllokuar rrugën e Shqipërisë drejt Europës, për pengesat që i janë vënë në këto 5 vite. Rrugën drejt Europës e pengon krimi dhe korrupsioni, hajdutëria dhe ortakllëku me krimin e organizuar.
Të gjithë në Shqipëri e dinë këtë dhe të gjithë në botë po e dëgjojnë. Nuk shkohet në Europë me gënjeshtra, por me të vërteta dhe vlera. Vlera kryesore e Europës është demokracia.
Sakrifica e opozitës është për të kthyer demokracinë e vërtetë, për të mos qenë fasadë në një Parlament krimi. Pengesa kryesore për integrimin e vendit në Europë është Shqipëria si Kolumbia, është vjedhja me qindra milionë lekë e taksave të shqiptarëve.
Nuk ka Parlament Shqipëria, por ka një bandë. Një nga tre deputetë është produkt i bashkëpunimit të Edi Ramës me krimin e organizuar. Nuk përfaqëson votën e shqiptarët, por Niçet, Bajrajt, Shullazët.
Hapat e mëtejshëm janë me qytetarët dhe për qytetarët. Për djegien e mandateve iu bindëm urdhrit të sovranit. Do gërshetojmë protestat, mosbindjen civile dhe çdo mjet tjetër kundër një bande, me turin tonë të shpresës, të alternativës që kemi për njerëzit. Do të shpalosim vizionin tonë, si do të duket e nesërmja e Shqipërisë”, u shpreh Basha.
