Deputeti i Partisë Demokratike, Agron Shehaj i cili nuk arriti të fitonte zgjedhjet për kreun e partisë, komentoi ftesën e kryetarit të zgjedhur Lulzim Basha, për t’u bashkuar ndaj kryeministrit Edi Rama.
I ftuar në emisionin “Opinion” në Tv Klan, Shehaj tha se ata nuk janë ndarë kurrë, por që kanë qenë gjithmonë të bashkuar kundër kryeministrit.
Pjesë nga biseda:
Blendi Fevziu: Ndërkohë çfarë mendon ti për zgjedhjet e Bashës?
Agron Shehaj: Si çfarë mendoj për zgjedhjet e Bashës…
Blendi Fevziu: Po, çfarë mendon, tha hajde bashkohemi kundër regjimit Rama-Doshi…
Agron Shehaj: Po ne nuk jemi ndarë kurrë, asnjëherë. Gjithmonë bashkë kemi qenë.
U rizgjodh në krye të PD/ Basha-rivalëve: Të bashkohemi, armiku ynë është Rama
Basha iu drejtua me një mesazh 3 kundërshtarëve të tij në zgjedhjet e djeshme, Agron Shehajt, Edith Harxhit dhe Fatbardh Kadillit, të cilët i ftoi për të vijuar betejën ndaj Ramës.
”Mirënjohja ime shkon edhe për tre kandidatët e tjerë, të cilët e bënë këtë garë të vërtetë , sfiduese dhe dinamike. Për secilin prej tyre kam një mesazh: Ne kemi mendime të ndryshme por parime të njëjta, prandaj jam i bindur se përtej diferencave, nga sot energjitë dhe përpjekjet tona do të shkojnë në drejtim të kundërshtarit të vetëm të Partisë Demokratike, dhe të shumicës dërmuese të shqiptarëve, regjimit Rama-Doshi.”, tha Basha.
Basha rizgjidhet kryetar i PD me 81% të votave
Demokratët votuan Lulzim Bashën për të udhëhequr PD-në edhe për 4 vitet e ardhshme. Basha është më i votuari ndër 3 kandidatët e tjerë që e sfiduan për të drejtuar partinë më të madhe në opozitë. Ai ka siguruar mandatin e tretë në krye të partisë së dytë më të madhe në vend, me rreth 81% të votave.
Basha mori 81% të votave ose 32.882 në total në të gjithë vendin. Pas tij më shumë vota grumbulloi Agron Shehaj, 6038 vota. Edit Harxhi mori 991 vota, ndërsa Fatbardh Kadilli 763 vota. Në total në të gjithë degët e PD-së votuan 41.095 anëtare ose 54.7% e totalit.
