Duke iu referuar situatës së krijuar politike, ish-ministri i Drejtësisë Ylli Manjani shprehet se kreu demokrat, Lulizm Basha duhet mbështetur, pasi, sipas tij, vendi ka nevojë për rotacion.
Përmes një postimi në “Facebook”, Manjani shkruan se rotacioni është mjeti i vetëm demokratik që mund të ndryshojë diçka, ndërsa shton se ka ardhur koha për ta aplikuar.
“Unë mbetem përkrahës i filozofisë së grupit dhe jo leader të vetëm. Por në këto kushte, po le të vijë Basha. Ta provojmë edhe atë. Por mbi të gjitha, të largojmë këtë që u qelb kokë e këmbë në pushtet që prej vitit 1999”, tha mes të tjerash ish-ministri.
Ndërkaq, Manjani sqaron se ky reagim iu provokua nga teori konspirative të miqve të tij, pas dëshmisë së Metës në Kuvend, i cili piu një kafe edhe me Gramoz Ruçin.
Postimi i plotë:
Jashtë konspiracionit.
Opozita dhe Lulzim Basha duhen mbështetur, jo se janë më të mirët, por se vendi ka nëvojë të ngutshme për rotacion.
Rotacioni është mjeti i vetëm demokratik që mund të ndryshojë diçka. Të paktën duhet të provojmë.
Rotacioni politik i pushtetit është përgjigja e pyetjes, “mirë ikin këta po kush do vijë?”
Kjo pyetje bëhet gjithmonë kur pushtetarët qelben në karrige.
Ata që kanë radhën do vijnë. Kush të dojë le të vijë, por kjo pyetje nuk mund të legjitimojë qëndrimin e të qelburve në pushtet.
Unë mbetem përkrahës i filozofisë së grupit dhe jo leader të vetëm. Por në këto kushte, po le të vijë Basha. Ta provojmë edhe atë.
Por mbi të gjitha, të largojmë këtë që u qelb kokë e këmbë në pushtet që prej vitit 1999.
P.S. Ky reagim mu provokua nga teori konspirative që miq të mi kanë ndarë me mua dje dhe mbrëmë deri vonë. Teori që bazoheshin tek ngjarjet e djeshme në Parlament, ku Meta piu edhe një kafe me Ruçin…
