Personat që realizuan vjedhjen spektakolare dje në Vlorë, dyshohet se janë grup i mirë-organizuar, të ardhur nga Fushë-Kruja, dhe jo amatorë. Ky përfundim vjen në sajë të dinamikës së ngjarjes, kryerjes së grabitjes në një zonë mjaft të populluar dhe largimi nga vendi i ngjarjes duke përdorur dy automjete për të humbur gjurmët.
Burime ende jo zyrtare thonë se janë grabitur nën kërcënimin e armës rreth 20 mijë euro. Këto janë detajet e reja që vijnë nga grabitja e furgonit të linjës Firence-Vlorë, mëngjesin e djeshëm, nën kërcënimin e armëve të zjarrit. Një perj autorëve të prangosur është Armand Kuqi, 29-vjeç, lindur në Mamurras dhe banues në Tiranë, ndërsa në kërkim janë edhe dy bashkëpunëtorët e tij. Të njëjtat burime shtojnë se janë identifikuar dy personat në kërkim, banorë nga Fushë-Kruja.
Grabitja
Në momentin e grabitjes, furgoni sapo kishte mbërritur dhe po parkonte. Udhëtarët ishin kryesisht pasagjerë që cilët vinin nga Italia, ndërsa shuma e parave të grabitura mbetet ende e paqartë, pasi fillimisht dje u raportua për 10 mijë euro, ndërsa burime nga policia pohojnë se janë rreth 20 mijë euro. Vetëm njërit prej pasagjerëve, një të moshuari, grabitësit i morën çantën me 4 mijë euro.
Detajet
Autorët e ngjarjes, pas grabitjes janë larguar menjëherë me dy automjete, të cilët në tentativë për t’iu shpëtuar forcave të policisë që ishin vënë në ndjekje të tyre, kanë braktisur 2 mjetet me të cilët ikën nga vendi i ngjarjes tek nënkalimi i “Panajasë”, dhe janë larguar në këmbë nëpër kodrat e “Panajasë” për t’u fshehur në pyll.
Nga policia e qytetit bregdetar bëhet me dije se pas 30 minutash ndjekjeje, falë mbështetjes edhe nga FNSH e Fierit, u bë i mundur kapja e 29-vjeçarit Armand Kuqi, lindur në Mamurras dhe banues në Tiranë. Ndërkohë është shoqëruar edhe një person tjetër, dhe po punohet nëse është i përfshirë ose jo në ngjarjen e ndodhur.
Policia ka identifikuar edhe një tjetër bashkëpunëtor në grabitje, e bën me dije se po vijon ndjekja për kapjen tij, por pa dhënë detaje për emrin.
Për këtë grabitje u angazhuan rreth 70 forca policore, të përbëra nga shërbimet e Komisariatit, Drejtorisë Vendore të Policisë Vlorë dhe Forcat Operacionale FNSH të Fierit, si dhe për ndjekjen e autorëve po përdoret edhe qeni i gjurmës.
Në cilësinë e provës materiale, policia ka bllokuar dhe sekuestruar 2 automjetet dhe 2 armët e zjarrit që dyshohet se janë përdorur nga autorët. Policia vijon veprimet procedurale dhe hetimet e mëtejshme në lidhje me zbardhjen dhe dokumentimin e plotë të ngjarjes.
https://tiranatoday.com/maskat-ia-moren-ne-mes-te-dites-4-mije-euro-mi-dergoi-djali-jane-para-te-vena-me-mund/
