Nga Anxhela Ferra
Pasi vari “këpucët në gozhde”, ish-kapiteni i Kombëtares nuk u largua nga bota e futbollit. Prej afro dy vitesh ai ka krijuar Fondacionin “Lorik Cana 5”. Me një qëllim të vetëm, të inkurajojë angazhimin e fëmijëve dhe të rinjve që të merren me sport.
Në qershor të 2017-ës, Lorik Cana inauguroi dy fusha të futbollit për fëmijë në Tiranë. Dhe prej atëherë aktiviteti i tij është zgjeruar në të gjitha qytetet e Shqipërisë. Së fundmi, ish-kapiteni ka nisur rrugëtimin e fondacionit të vetë edhe në Kosovë. Me projektin e parë duke ndërtuar fushën multi-funksionale në Prishtinë.
Në një intervistë për Tirana Today ai thotë se qëllimi i tij është të zgjerohet në të gjitha trojet. Kjo pasi është shumë e rëndësishme që fëmijët të merren me sport.
“Mua shpesh më thonë se ku e kemi qëllimin e ku duam të arrijmë. Përgjigjja është shumë e thjeshtë. Ata fëmijë që nuk e kanë akoma mundësinë të kryejnë aktivitete fizike, t’ia realizojmë. Do mundohemi të bëjmë sa më shumë, të japim shembujt e duhur për shoqërinë. Kështu besoj se do t’ia dalim. Në kuadër të fondacionit e kam të vështirë ta quajë bamirësi, është më tepër një kontribut për shoqërinë. Për rininë nëpërmjet sportit dhe mua më jep një kënaqësi shumë të madhe. Sepse e di që është një vlerë që i bën vetëm mirë fëmijëve.
Ne sigurisht që jetojmë në një realitet fatkeqësisht ka edhe varfëri të skajshme. Dhe kjo është më e vështirë për tu përballuar e do një energji të madhe. Bamirësinë e fillon me njerëzit e afërt që ti ke, me prindërit, familjarët, shoqërinë. Më pas zgjerohet, ndikon te një fshat e deri te organizatat tona, si “Fundjavë Ndryshe” e cila ka arritur të çojë peshë. E të organizojë me qindra të rinj vullnetarë, në një kauzë si bamirësia.”
Ndër të tjera Cana foli për përfshirjen e sa më shumë figurave publike në aktivitete bamirësie e kauza sociale.
“Besoj që ka shumë figura tona publike që janë të përfshirë në vepra të mira. Disa janë ende aktiv nëpër punët e veta profesionale, por nuk e harrojnë ndjekjen e një kauze. Kemi dhe figura të njohura e ndërkombëtarisht, si Rita apo Dua që gjithmonë e kanë pasur të gatshme të vijnë. E të jenë humane e të bëjnë bamirësi.
Janë edhe ata të cilët me organizata të ndryshme, mundohen t’i ndihmojnë. Emina Çunmulaj është një rast i jashtëzakonshëm, e cila ka një dashamirësi të bëjë sa më shumë mirë. Dhe nuk ka bërë pak, përkundrazi ka bërë shumë.”
Përgjatë viteve të fundit përherë e më tepër shumë figura të njohura në vend i janë bashkuar shpesh nismave humanitare. Kjo pasi në Shqipëri, por edhe në treva të tjera shqiptare varfëria ekstreme është shumë prezent. Ndaj personalitete të njohura herë kanë zgjedhur të krijojnë vetë nisma,e herë të tjera bashkëpunojnë me organizata të ndryshme. Me një qëllim, t’i vijnë në ndihmë njerëzve në nevojë, atyre që nuk kanë mundësi e që ndjehen ndryshe./ TIRANA TODAY
