Ish-presidenti Bamir Topi, ka deklaruar në emisionin “Pikat mbi I” në “News24” se Berisha kthehet në krye të PD-së, dhe se është rasti tipik klasik i kthimit për shkak të instiktit të mbijetesës. Në analizën e tij, Topi u shpreh se Berishës i duhet fitorja minimumi, e më tej largimi i Bashës, ku sipas tij, e damkosi me largimin nga PD-ja.
“S’ka nevojë për transkriptim, është e qartë situata. Berisha është kthyer për të marrë PD-në padiskutim. S’më pëlqen të interpretojë se çfarë ka z. Berisha në subkoshiencë. Ai ka bërë të ditura arsyet se pse ka dalë në skenë. Ne e dimë arsyen.
Ne e dimë se bota biologjike funksionin mbi bazën instiktive. Edhe në fushën politike, atje ku cënohet ekzistenca e llojit në politikë, futet edhe instinkti. Në këtë rast kemi rastin klasik të kthimit për shkak të instinktit të mbijetesës.
Gjatë rrugës, ai nuk u kthye që të marrë drejtimin e PD-së, por u kthye në një pozicion mbrojtës. Madje në fillim ishte i ndrojtur. Takimet e tij ishin të kufizuara, të zgjedhura. Shkoi atje ku kishte garanci te njerëzit. Ai fiton kurajo. Ndoshta kjo mund të jetë dhe lëvizje taktike e tij, ndaj s’dua që të futem në subkoshiencën e tij. Atij i duhet fitorja minimumi, largimi i Bashës, që e damkosi me largimin nga PD-ja. Nuk besoj se ai ka projektuar veten e vetë”, tha Topi.
